Iha loron 22 fulan Fevereiru tinan 2025, ekipa ANP, ne’ebé lidera husi Prezidente Gualdino do Carmo da Silva, vizita fatin rekuperasaun materiál CALTECH nian iha Beduku. Vizita ida ne’e ho objetivu atu hametin ligasaun ho grupu negósiu ne’ebé susesu iha setór jestaun projetu Timor-Leste nian, hodi hametin haburas kolaborasaun no troka hanoin entre ANP no CALTECH, ne’ebé foka jestaun lixu no prepara CALTECH ba projetu sira iha futuru.
Nain ba Caltech Timor-Leste, hanesan mós Ko-fundadora no Konselleira, Sheilla de Caldas, hamutuk ho Jerente Jerál Grupu nian, Andy Jacob, akompañia ekipa ANP ba vizita fábrika Caltech nian no fornese vizaun jerál ida ne’ebé komprensivu kona-ba instalasaun fasilidade, prosesu separasaun lixu nian ne’ebé inklui triajen plástiku, vidru, roda no lixu jerál. Sira mós introdús solusaun resiklajen oioin, inklui Triplex Tipu 3, ne’ebé kategoriza ba Industrial Marine no Premium Triplex Circular ne’ebé amigavel ba ambiente, materiál sira ne’ebé dura hodi uza ba nesesidade projetu nian.
Vizita ne’e hanesan kontinuasaun husi enkontru kortezia ne’ebé hala’o iha loron-sesta, 21 Fevereiru 2025. Durante enkontru ne’e, Nain ba Caltech Timor-Leste, hanesan mós Ko-fundadora no Konselleira, Sheilla de Caldas, no Jean Vezina, ho Prezidente ANP, Gualdino da Silva, troka ideia sira kona-ba jestaun lixu nian.
